Ing jaman biyen, ana sawijining negara
sing adil lan makmur. Sing jumeneng nata Prabu Suryabawana. Prabu Suryabawana
kaloka minangka ratu sing adil paramarta. Kabeh kawulane padha urip ayem
tentrem, ora kurang sandhang lan pangan, lan tansah seger kuwarasan. Prabu
Suryabawana uga kondhang minangka ratu sing asih marang sadhengah kewan. Salah
sijine kewan sing dadi klangenane sang prabu yaiku pitik babon lan kuthuke
cacah sanga.
Sang Prabu banget anggone nresnani
marang babon lan kuthuke. Pitik-pitik kasebut dipakani sedina kaping telu:
esuk, awan, lan sore. Pakan sing diwenehake awujud pakan sing enak-enak. Saben
esuk, sawise dipakani, pitik-pitik kuwi dikeparengake dolan lan saba ing
petamanan kraton. Dheweke dolanan kanthi seneng lan gambira, ora ana sing wani
ngganggu lan ngrusuhi.
Dina iki mujudake dina sing nyenengake
tumrape si babon lan kuthuk-kuthuke. Srengenge sumunar padhang tanpa
kaling-kalingan mendhung. Sorote njalari rasa anget ing awake sing kadhemen ing
mangsa rendheng iki. Sawise sarapan, babon lan kuthuk-kuthuke padha dolanan.
Dheweke diparengake dolan menyang njaban tembok kraton. Dheweke seneng banget
jalaran bisa ngerti swasana ing njaban tembok. Kalodhangan kaya ngene iki wis
suwe diangen-angen.
“Suk Kapan ya, aku dikeparengake dolan
menyang njaban tembok kraton?” ngono pangudarasane si babon. Lan saiki
angen-angene klakon.
Srengenge wis saya dhuwur. Nuduhake
manawa dina saya awan. Tanpa dirasa, anggone dolan saya adoh saka kraton.
Dumadakan angin tumiyup banter. Srengengene ketutupan mendung sing nggameng.
Hawane saya adhem. Iki mertandhani yang bakal udan deres. Kuthuk-kuthuk kuwi
keweden.
“Mbok, iki ana apa? Kok kaya ngene?”
“Ora susah wedi. Iki mertandhani bakal
udan. Ora susah wedi. Udan kuwi rahmate Gusti sing Maha Kuwasa. Dadi dudu bab
sing medeni.”
“Mbok, awake dhewe anggone dolan wis
adoh saka kraton. Apa bisa mulih yen udane deres?”
“Katone wengi iki kudu turu ing alas
iki. Coba tunggunen sedhela ing kene. Aku bakal menek wit kuwi. Dakdeloke saka
kono mbok manawa ana papan kanggo turu wengi iki. Sokur ana gubug. Dadi bisa
kanggo ngeyup.”
Si babon age-age ngunggahi pang-pang wit
sing dhuwur. Saka papan kuwi bisa nyawan sakiwa-tengene alas. Katon ing kadohan
ana sunare lampu kang sumorot saka sawijine gubug.
“Ana. Neng sisih wetan kae ana gubug.
Ayo padha mrana!”
Si babon saanak-anake age-age padha
tumuju menyang gubung. Nalika iku langit sansaya peteng dening mendhung sing
kandel. Tumiyupe angin nambahi swasana sansaya nggegirisi. Si babon ngajak
anak-anake supaya lumaku luwih cepet.
“Ayo, enggal. Udane selak teka!”
Ing sawijining enggokan dalan, si babon
rumangsa yen ana sing ngetutake lakune. Dheweke banjur mandheg sedhela lan
mengo memburi. Satleraman dheweke ngerti buntute garangan ing sewalike grumbul.
Si babon age-age mrentahake kuthuk-kuthuke supaya mlaku luwih cepet.
“Ayo, cepet. Galo kae udane wis teka.”
Kuthuk-kuthuk kuwi enggal-enggal lumayu
tumuju gubug.
Si garangan kanthi mindhik-mindhik
ngetutake lakune pitik-pitik kuwi.
Satekane gubug, udane uga teka. Deres
banget. Si babon age-age mrentahake kuthuk-kuthuke munggah menyang pethi sing
mapan ana ing pojok gubug. Pethi kuwi ketutupan gegodhongan kesambi sing
manglung ing gubug. Kanthi mangkono kuthuk-kuthuk kuwi ora katon dening si
garangan. Sedheng si babon njaga kuthuk-kuthuke ing sangarepe pethi.
Udane terang nalika lingsir wengi. Si
babon isih tetep ora turu, sedheng kuthuk-kuthuk kuwi padha turu angler. Si
babon duwe pangira manawa udane terang, si garangan bakal mangan dheweke lan
kuthuk-kuthuke.
“Wah, iki bakal mbebayani. Aku kudu
waspada. Aku kudu ngerti ing ngendi dununge si garangan. Kanthi mangkono aku
bisa endha samangsa si garangan bakal mangsa aku lan anak-anakku. Coba
dakpancinge. Daksapane”
Si babon banjur ngadeg saka anggone
ndhekem. Dheweke banjur cluluk kanthi swara sing sumedulur.
“He, kisanak garangan sing bagus tur ber
budi. Mbok kene, nyedhak kene. Dakwenehi papan kanggo turu. Kene papane garing
tur anget.”
Ora ana wangsulan.
“Aja turu neng ngisor uwit, Kisanak. Yen
kadhemen, kowe mengko bisa lara.” si babon cluluk maneh.
Pancingane si babon kasil. Si garangan
wangsulan, “Ora, nisanak. Kene garing. Aku neng paga pawon. Aku neng kene wae.
Kene ya garing lan anget.”
Si babon wis ngira yen si garangan duwe
niyat ala, mula saka kuwi si babon tetep ora turu. Nalikane wengi saya lingsir,
apa sing dinuga sadurunge kabukten. Si babon krungu swara kumlesete sikile si
garangan.
“Kisanak. Apa kowe durung turu?”
Si garangan kaget.
“Jebul dheweke durung turu ta,”
pangudarasane si garangan.
“Kisanak garangan.” Cluluke si babon.
“Durung, Nisanak. Aku durung turu.
Yagene kowe ya durung turu?”
“Rasane mripatku wis ngantuk. Iki aku
arep turu.” wangsulane si babon.
Si babon age-age nggugah kuthuk-kuthuke.
“Wetengku lara. Mbok menawa kewaregen
anggonku mangan awan mau. Yen anak-anakku wis padha turu kawit mau.”
Kuthuk-kuthuk kuwi banjur dikon mlumpat
mbaka siji.
“Sing ngati-ati. Aja nganti keprungu
dening si garangan.”
Siji mbaka siji kuthuk-kuthuk kuwi
mudhun saka pethi.
“Kuwi swara apa, Nisanak?” pitakone si garangan.
“O, kuwi swara godhong kesambi sing
gogrog.
“Godhong sing gogrog akeh ya, Nisanak?”
Kuthuk-kuthuk kuwi wis padha mudhun saka
pethi kabeh banjur lunga. Saiki mung kari si babon sing isih ana gubug. Si
babon banjur ngemuli lumpang cilik sing ana ing ngarep pethi nganggo damen.
Sabubare kuwi si babon banjur lumayu nututi kuthuk-kuthuke lunga saka gubug
kuwi.
Si garangan sing ora krungu swara
apa-apa ngira yen si babon wis turu angler.
“Nisanak. Nisanak. Kowe wis turu ya? Aku
ya arep turu. Aku ngantuk banget.” Cluluke si garangan sinambi jinjit-jinjit
nyedhak papane si babon.
“Wah, dheweke wis turu. Kemulan damen
lan ora obah-obah. Wah, sida mangan enak tenan wengi iki.” pangudarasane si
garangan.
Si garangan banjur ancang-ancang arep
numbruk si babon. Kanthi tenaga diketogake, dheweke banjur mlumpat nubruk si
babon.
“Adhuuuhh...” si garangan njerit
kelaran. “Barang apa iki kok atos banget. Adhuh untukku copot. Adhuh, adhuh
....”
Si garangan nangis kelaran. Dheweke
banjur ninggalake gubug kuwi.
Dina candhake, si babon lan
kuthuk-kuthuke tekan ing kraton. Dheweke banjur matur marang Sang Prabu ngenani
kedadean ing wengi kasebut. Mireng ature si babon, Sang Prabu duka banget,
banjur dhawuh supaya kabeh garangan ing negara iki dikumpulake ing balairung kraton.
“He, kabeh garangan kawulaningsun. Dina
iki ingsun arep nganakake pista mung kanggo kawulaku garangan. Ingsun wis
ndhawuhake marang juru masak kraton supaya nyediyakake panganan lan omben-omben
sing nikmat. Iki kabeh kanggo kowe. Coba delengen ing sisih pojok balairung
kana.”
Garangan-garangan padha mengo menyang
papan sing didhawuhake Sang Prabu.
“Kae kabeh kanggo kowe. Wis saiki padha
mangana sawaregmu.”
Kabeh garangan banjur padha mangan
kanthi senenge ati. Nanging ana garangan siji sing ora mangan.
“Yagene kowe ora mangan, garangan?”
pandangune Sang Prabu.
Si garangan mung meneng.
“He garangan, wangsulana, yagene kowe
ora mangan?”
Si garangan isih meneng sinambi nutupi
congore.
“Kowe wani karo ratumu ya? Kowe wani
mbadal dhawuhku?” ngendikane Sang Prabu semu duka.
Si garangan wedi banget. Awake
ndhredheg, gemeter kaber. Kanthi congor wel-welan, si garangan banjur matur.
Nalikane si garangan arep matur, Sang Prabu pirsa manawa untune si garangan
perangan ngarep ompong papat. Kanthi mangkono Sang Prabu pirsa manawa si
garangan kuwi sing bakal mangsa klangenane Sang Prabu, yaiku si babon lan
kuthuk-kuthuke. Sang Prabu banjur dhawuh marang prajurit supaya nyekel si
garangan lan menehi pidana sing murwat karo tumindake.
Sumber:
Legenda Asli Rakyat Lampung
No comments:
Post a Comment